Hebreeën 5:11-6:8

¹¹ Der is nog veul meer over te zeggen, mor t is stoer om t oet te stokken: t duurt ja zo laank veurdat ie t onder pet hebben!
¹² Ie haren, noar tied rekend, ja al laank zulm leermeesters wezen mouten. Mor ie hebben der meer verlet om dat men joe t ABC van God zien bosschop biebrengt. t Is zo wied kommen, dat ie mouten weer aan vlès. Stevege kost kin ie ja nait verdroagen.
¹³ Elk dij nog aan vlès is, het gain wait van goud of kwoad: dij is nog mor n lutje potje.
¹⁴ Mor grode mensken kriegen stevege kost. Dij hebben heur vermogens bruken leerd om onderschaaid te moaken tussen goud en kwoad.

⁰¹Loat we doarom t begun van Christus zien leer loaten veur wat of t is en t gaauw hebben over t èn en t doul der van. Wie willen nait vannijs grondloag leggen: t joe ofkeren van n menaaier van leven dij oetlopt op dood en van geleuf in God.
⁰²Net as van t onderricht over deup, van t opleggen van handen, opstanden van doden en t aiweg oordail.
⁰³En dat zel we doun, as God t toustaait teminnent.

⁰⁷t Is net zo as mit n lap laand: dat zogt regen op dat ter ieder moal op vaalt. Dat brengt boeren dij t laand beaarbaiden, goie vrucht op. Op zo’n lap ligt God zien zegen.
⁰⁸Mor laand dat doorns en stiekels oplevert, het gainain wat in reken. Den is t net of ter n vluik op ligt en op t lest gaait brand ter in.