1 Samuël 14:36-46

³⁶ “Loat wie,” zee Saul, “vannaacht achter Filistijnen aan goan en heur plundern aan mörgenvroug tou, en gainain van heur in levent loaten!” “Dou aal wat joe goud tou liekt,” zeden ze. Mor priester zee: “Loat wie hier tot God goan.”
³⁷ Saul vruig aan God: “Zel ik achter Filistijnen heer goan? Zel ie heur in Israël zien macht geven?” Mor hai gaf hom gain beschaaid dij dag.
³⁸ “Loat aanvoerders van t volk aantreden,” zee Saul. “Perbaaier der achter te kommen wat oorzoak wezen kin van dizze schuld.
³⁹ Want zo woar as de HEER leeft dij Israël verlöst het, al ligt t aan mien zeun Jonatan, hai zel zekerwoar staarven!” Mor der was gainain van t haile volk dij hom antwoord gaf.
⁴⁰ “Ie mouten aan ain kaant stoan goan en ik en mien zeun aan aander kaant,” zee Saul tegen hail Israël. “Dou wat joe goud tou liekt,” zeden ze.
⁴¹ “God van Israël,” zee Saul tegen de HEER. “Loat woarhaid aan t licht kommen.” Dou werden Saul en Jonatan aanwezen en t volk ging vrij oet.
⁴² “Loat t löt beslizzen tussen mie en mien zeun Jonatan,” zee Saul. Jonatan wer aanwezen.
⁴³ “Zeg mie wastoe doan hest,” vruig Saul. Dou vertelde Jonatan t hom: “Joa, ik heb mit punt van stòk dij k in haand haar, n luk beetje hunneg pruifd. Hier bin k! k Bin der kloar veur om te staarven!”
⁴⁴ Dou zee Saul: “Zo mag God mie doun of nog slimmer, doe most staarven, zunder nee!”
⁴⁵ “Mout Jonatan staarven?” zee t volk tegen Saul. “Jonatan, dij dizze grode overwinnen in Israël behoald het? Gain sproake van! Zo woar as de HEER leeft, der zel gain hoar van zien kop op grond valen, omreden hai het dit doan op dizze dag mit God zien hulp.” Zo verlöste t volk Jonatan en hai sturf nait.
⁴⁶ Noadat Saul Filistijnen achternoazeten haar, ging e weerom. Filistijnen gingen noar heur aigen woonstee tou.