Braif aan Kolossers 03 : 8 – 4 : 6

⁸ Vraauwlu, wees onderdoaneg aan joen man. Dat heurt ja zo woar de Heer woont.
¹⁹ Manlu, hol van joen vraauw en vaal nait tegen heur oet.
²⁰ Kinder, wees geheurzoam aan joen olders. Dat wordt ja op pries steld doar de Heer woont.
²¹ Voaders, hoal joen kinder t bloud nait onder noagels vandoan. Aans konden ze moudveren wel ais hangen loaten.
²² Sloaven, wees joen boazen hier op eerde in ale opzichten geheurzoam. Nait deur heur noar ogen te kieken om bie heur in gunst te kommen, mor oprecht van haart, oet ontzag veur de Heer.
²³ Wat of ie ook doun, loat joe t ainmoud wezen of dee ie t veur de Heer en nait veur mensken.
²⁴ Ie waiten ja: ie kriegen van joen Heer der wat veur weerom: ie maggen dailen in zien aarvenis. Christus is ja de boas bie wèl of ie dainen.
²⁵ Wèl of kwoad dut, krigt ook ja weerom wat of e doan het. En den moakt t God niks oet wèl of e veurhet.

⁰¹Boazen, loat joen sloaven toukommen doar of ze recht op hebben en wat billek is. Ie waiten toch wel dat ie ook n boas boven joe hebben, in hemel?

⁰²Hol aan mit beden. Blief doar mor ais veur op, oet dankboarhaid.
⁰³Den kin ie tougelieks ook veur ons beden, dat God deur van ons mond opendut om van Christus zien gehaaim te vertellen, doar ik ja om vastzit;
⁰⁴dat ik dat zo helder noar veuren brengen mag as ik dat heur te doun.

⁰⁵Goa verstandeg om mit lu dij naargens aan doun. As ie gelegenhaid kriegen, moak joe der den vrij veur.
⁰⁶Breng wat ie den zeggen aaltied zo aantrekkelk noar veuren, dat mensken smoak dervan te pakken kriegen. En wèl of ie ook veurhebben, zit nait om n weerwoord verlegen.