Lucas 10:38-42

³⁸ Dou ze wiedergoan wazzen, kwam e in ain of aander dörp. n Vraauw dij Marta haitte, ontvong hom in heur hoes.
³⁹ Zai haar n zuster dij Maria haitte. Dij ging aan de Heer zien vouten zitten en lusterde noar zien woord.
⁴⁰ Mor Marta haar handen vol mit bedainen. Zai ging bie hom stoan en zee: “Heer, ligt joe der niks aan gelegen dat mien zuster mie t aal allain doun let? Zeg heur toch, ze mout mit aanpakken!”
⁴¹ Mor de Heer zee tegen heur: “Marta, Marta, doe moakst die bezörgd en drok over veulsteveul.
⁴² Der is mor zo’n beetje neudeg. Of ainlieks mor ain ding! Maria het dat goie dail oetkozen en dat zel heur nait ofnomen worden!”