Johannes 9:13-23

¹³ Dou brochten ze man dij blind west haar noar Farizeeërs tou.
¹⁴ Nou was t net sabbat dou Jezus smurrie moakt haar en man van zien blindhaid ofhulpen haar.
¹⁵ Farizeeërs vruigen hom ook hou of t kwam dat e inains zain kon. “Hai dee mie wat smurrie op ogen,” zee e, “dou mos k dat ter weer ofwasken en nou kin k zain.”
¹⁶ n Stokkewat Farizeeërs zeden: “Hai holdt sabbat nait; den kin dij man nait bie God votkommen.” Mor aandern zeden: “Hou kin ain dij zo slecht is, zokse taikens zain loaten?” Ze wazzen t haildaal nait mitnkander ains.
¹⁷ “Wat vindst zulm van hom?” vroagen Farizeeërs vannijs. “Doe bist ja dij e t licht in ogen weeromgeven het!” “Hai mout wel n profeet wezen,” zee e.

¹⁸ Jeuden wollen der nait aan dat man altied blind west haar en nou inains weer zain kon. Doarom luiten ze zien ollu kommen.
¹⁹ Ze vruigen heur: “Is dit joen zeun en beweer ie dat e van kindsdoagen òf aan blind west het? Hou kin t den dat e nou aal zain kin?”
²⁰ “Wie waiten dat dit ons zeun is en ook dat e blind geboren is,” zeden zien ollu.
²¹ “Mor wat ter gebeurd is dat e nou zain kin of wèl hom van zien blindhaid ofhulpen het, doar wait wie niks van. Mor vroag hom t zulm, hai is maans genog om t zulm te zeggen!”
²² Zien ollu deden dit, omreden ze wazzen baang veur Jeudse laaiders; dij haren al mitnkander ofproat: “Elk dij Jezus as Messias erkennen zol, huift hier nait weer in sinagoge te kommen.”
²³ Doarom haren zien ollu zegd: “Hai is maans genog om t zulm te zeggen.”