Lucas 9:10-17

¹⁰ Dou apostels weeromkwammen, vertelden ze hom aal wat of ze oetricht haren. Hai nam heur allain mit en zunderde zok mit heur òf in n stad, Betsaïda.
¹¹ Dou lu dat gewoarwerden, gingen ze hom achternoa. Hai luit heur bie zok kommen en pruit mit heur over God zien riek. Dij hulpen worden mozzen, muik hai beter.
¹² Dou t tegen oavend laip, kwammen de twaalm bie hom en zeden tegen hom: “Stuur t volk vot! Den kinnen ze noar dörpen en ploatsen hieromtou goan en doar onderdak en eten kriegen. Wie binnen hier ja op n ainzoam stee.”
¹³ Mor hai zee tegen heur: “Geef ie zulm heur eten!” Zai zeden: “Wie hebben ja aans niks bie ons as vief broden en twij vizzen. Den zol wie hèngoan mouten en kopen veur aal dit volk eten.”
¹⁴ Der wazzen ja zo om en bie viefdoezend man. Dou zee hai tegen zien leerlingen: “Loat heur in koppels van zo’n man of fiefteg zitten goan.”
¹⁵ Dat deden ze en ze kregen heur aalmoal te zitten.
¹⁶ Dou nam e dij vief broden en dij twij vizzen, keek noar hemel op en beedde zegen der over. Hai brook ze en gaf ze aan leerlingen, dat dij ze aan t volk veurzetten zollen.
¹⁷ Ze atten en werden aalmoal zat. Wat of ter over bleef wer deur heur opzöcht: twaalf körfvol.