Bijbeltekst voor 15 maart 2025 uit de Grunneger biebel

Bijbelteksten

Bijbeltekst voor 15 maart 2025

⁰¹Of proat ik ook ale toalen van mensken en engels – as ik gain laifde heb, den bin ik n dreunende trom of n rinkelnd bekken. ⁰²Of heb ik ook de goave dat ik profetaaiern kin en wait ik ale gehaaimen, joa aal dat ter te waiten is, en of heb ik ook n onbepaarkt vertraauw zodat ik baargen oetzied zetten kin – as ik gain laifde heb, den bin k gain stuver weerd. ⁰³Of zol k ook aal mien goud (onder aarme mensken) verdailen, en of zol k mien levent beschikboar stellen om der van snaren te kinnen – as ik gain laifde heb, den helpt mie dat gain spier. ⁰⁴Laifde het laank geduld. Laifde is vrundelk. Ze is nait niedsk, snidt nait op, is nait grootsk. ⁰⁵Ze dut nait onfersounlek, is nait op aigen veurdail oet. Ze is nait prikkelboar, nait hoatdroagend. ⁰⁶Ze het niks op mit gemaineghaid. Mor oprechthaid, doar het ze oardeghaid aan. ⁰⁷Ze wil van aal heur rechten wel ofstand doun, het overaal vertraauw in, overaal verwachten van, kin ales oetstoan. ⁰⁸Laifde krigt nooit ontslag. Neem den ais goaven van profetaaiern: dij zellen ain keer oetschoakeld worden. Of goaven van vremde toalen: dij zellen ain keer opholden. Of kennes: dij zel ain keer doan waark kriegen. ⁰⁹t Is ja mor n hap en n snap wat of wie waiten en profetaaiern. ¹⁰ Mor as t volmoakte komt, is t mit dat krummeln doan. ¹¹ Dou ik kind was, was mien proat, mien prakkezoatsie, mien rezenaaiern dat van n kind. Mor nou k n kerel worden bin, bin k ter mit oetschaaid mie as kind te gedroagen. ¹² Nou zain we t spul ja nog in spaigel: t is roaden hou of t ter nou krekt oetzugt. Mor den krieg we boudel liek veur ogen. Nou leer ik nog mor n hap en n snap, mor den zel ik ales deurhebben, krekt zo as God mie deurhad het. ¹³ Op t heden holden dizzent hier ale drij nog tou: geleuf, hoop, laifde. Mor van dij drij gaait laifde der mit deur.

1 Korintiërs 13:1-13