2 Kronieken 1:1-17

⁰¹Salomo, Davids zeun, regaaierde zien keunenkriek mit vaaste haand; de HEER, zien God was ja bie hom en muik hom hoog in aanzain. ⁰²Salomo luit oet hail Israël de aanvoerders over doezend man en dij over honderd man bie zok kommen en ook de rechters, de stamvorsten en de femilie-oldsten oet hail Israël. ⁰³De haile gemainschop ging mit Salomo noar de ovverhögte bie Gibeon. Doar ston Gods soamenkomsttènt ja, dij Mozes, knecht van de HEER, in de woestijn moaken loaten haar. ⁰⁴De aark van God haar David al tou Kirjat-Jearim oet noar Jeruzalem tou brengen loaten, noar de tènt dij hai doarveur opzet haar, op t stee dat hai doarveur ofriggeld haar. ⁰⁵Mor t bronzen altoar dat moakt was deur Besaleël, zeun van Uri, dij weer n zeun van Chur was, ston nog aaltied veur tabbernoakel van de HEER. Noar dat altoar gingen Salomo en de gemainte. ⁰⁶Salomo ovverde doar de HEER bie was, op t bronzen altoar dat bie de soamenkomsttènt heurde, wel doezend brandovvers. ⁰⁷In dij aigenste naacht verscheen God aan Salomo en hai zee tegen hom: “Zeg ais, wat wolstoe van mie hebben?” ⁰⁸Salomo gaf aan God as antwoord: “Ie hebben aan mien voader David n grode gunst bewezen en ie hebben mie in zien stee alderdeegs keunenk moakt. ⁰⁹Loat den, HEER, mien God, oetkommen wat ie aan David, mien voader, beloofd hebben. Ie hebben mie ja keunenk moakt over n volk, zo ontelboar groot as t stof van de wereld. ¹⁰ Geef mie veur nou zoveul wieshaid en kennes dat ik dit volk veurgoan kin en laaiden. Wèl aans zol dit grode volk van joe richten kinnen?” ¹¹ Dou zee God tegen Salomo: “Omdat nou juust dit in dien haart leeft, omdastoe nait vroagd hest om riekdom en bezittens, nait om aigen aanzain of t levent van dien vijanden, alderdeegs nait om n laank levent, mor om wieshaid en kennes om dit volk doar ik die as keunenk over aansteld heb, richten te kinnen, ¹² doarom geef ik die dij wieshaid en kennes, mor boetendes geef ik die riekdom, en bezittens, en aanzain, zo as veur die nog nooit n keunenk had het en noa die ook nooit ain kriegen zel.” ¹³ Doarnoa ging Salomo van de ovverhögte van Gibeon, doar de soamenkomsttènt ston, noar Jeruzalem weerom en hai regaaierde Israël. ¹⁴ Salomo schafte zok zoveul woagens aan en brochde zoveul peervolk bie nkander, dat hai haar op t lest vattienhonderd striedwoagens en twaalfdoezend man peervolk. Hai legerde heur in garnizounssteden en ook in zien aigen kezèrn in Jeruzalem. ¹⁵ Deur t belaaid van keunenk Salomo wazzen gold en zulver net zo gewoon as stainen, en cederbomen kwammen der net zo veul veur as wilde viegebomen in de Leegte. ¹⁶ Salomo luit zien peerden invoeren oet Egypte en Kewe; kemizziekopers van de keunenk kochten dij doar tegen dagpries. ¹⁷ Striedwoagens luit hai ook invoeren oet Egypte veur zèshonderd sjekel zulver t stok en peerden veur honderdfiefteg sjekel zulver t stok. Kemizziekopers verkochten heur ook deur veur de oetvoer noar ale keunenks van de Hethieten en van de Arameeërs.