2 Kronieken 5:2-14

⁰²Dou luit Salomo de vernoamsten van Israël, ale stamoldsten en femilievorsten van de Isrelieten noar Jeruzalem kommen om de aark van t verbond van de HEER op te hoalen oet de stad van David, dij ook Sion nuimd wordt. ⁰³Ale manlu van Israël kwammen bie de keunenk op t feest, dat in de zeuvende moand holden wer. ⁰⁴Dou de oldsten van Isrelieten bie nkander wazzen, tilden de Levieten de aark op. ⁰⁵Zai brochten de aark en de soamenkomsttènt over mit aal t haailege raif dat doarbie heurde. Dat gebeurde deur de priesters van de Levieten. ⁰⁶Keunenk Salomo en ale Isrelieten dij bie hom kommen wazzen veur de aark, ovverden zoveul schoapen en segen en rundvij dat t nait meer te tellen of te schatten was. ⁰⁷Zo brochten de priesters de aark van t verbond mit de HEER noar zien stee, in de achterzoal van tempel, t alderhaailegste, tot onder de vleugels van de cherubs. ⁰⁸Cherubs spraaidden heur baaide vleugels oet over t stee van de aark en zetten zodounde de aark mit droagbomen en aal in schaar. ⁰⁹Droagbomen wazzen zo laank, dat de oetènnen boeten de achterzoal te zain wazzen, mor wieder weg wazzen ze nait te zain. De aark is doar tot op t heden. ¹⁰ In de aark lag niks aans as de twij stainen ploaten dij Mozes doarin legd haar op Horebbaarg. Doar haar de HEER n verbond mit de Isrelieten sloten dou ze tou Egypte oettrokken wazzen. ¹¹ Dou kwammen de priesters tou t haailegdom oet noar boeten tou. Ale priesters dij aanwezeg wazzen, haren zok netgliek bie welke ofdailen ze heurden, ritueel wosken. ¹² Ale zangers van de Levieten, zo as Asaf, Heman, Jedutun en heur zeuns en bruiers stonden in heur fienlinnen klaaier, mit bekkens, haarpen en lieren aan oostzied van t altoar kloar. Bie heur stonden honderdtwinneg priesters dij op trompetten bloazen mozzen. ¹³ Dou begunden zai aalmoal tougelieks te bloazen en n loflaid te zingen tou eer van de HEER. En bie t geschetter van trompetten en meziek van bekkens en aander instermenten, dou zai zongen: “Pries de HEER, want hai is goud. Zien traauw komt ja gain èn aan,” op dat ogenblik, wer t haile hoes van de HEER vol mit n wolk. ¹⁴ Priesters konden deur dij wolk doar nait stoan blieven om heur gewone dainstwaark te doun, want t hoes van God was vol van de glorie van de HEER.