t Evengelie volgens Lucas 5:17-26

¹⁷ Op n goie dag dou e aan t onderwiezen was, zatten der ook Farizeeërs en schriftgeleerden. Dij wazzen kommen oet ale dörpen van Galilea en Judea en oet Jeruzalem. Hai haar kracht van de Heer, dat hai mensken beter moaken kon. ¹⁸ En doar kwammen lu mit n verlamde man op n droagbèr. Ze deden heur best om hom in hoes te kriegen en veur hom deel te leggen. ¹⁹ Mor dou ze gain kaans zagen om hom in hoes te droagen vanwegens aal t volk, gingen ze op t dak en luiten hom deur daktegels deel mit bèr en aal middenmaank mensken, vlak veur Jezus. ²⁰ Dou hai heur geleuf zag, zee e tegen man: “Vrund, dien zunden binnen die vergeven!” ²¹ Dou vruigen schriftgeleerden en Farizeeërs zok òf: Wat is dat wel veur ain dat e zokke godslasterlieke dingen zegt? Wèl kin nou zunden vergeven as God allain? ²² Mor Jezus haar heur wel deur. Hai zee tegen heur: ²³ “Woar prakkezaaier ie over? Wat is makkelker, te zeggen: ‘Dien zunden binnen die vergeven’ of te zeggen: ‘Stoan goan en lopen’? ²⁴ Mor k zel joe zain loaten dat Menskenzeun macht het in wereld zunden te vergeven.” Dou zee e tegen dij verlamde: “Die zeg ik: goa stoan! Pak dien bèr op en goa noar hoes tou!” ²⁵ Ze zagen aalmoal dat e votdoalek stoan ging, zien bèr doar e op legen haar, mitnam, en noar hoes tou ging, mit lof en daank aan God. ²⁶ Ze ruiken aalmoal boeten zokzulm en prezen God. Vol ontzag zeden ze: “Vandoag heb wie wonderboarlieke zoaken zain.”