2 Kronieken 1:18-2:9

¹⁸ Salomo nam zok veur dat hai zol n hoes veur de noam van de HEER baauwen loaten en n keunenkliek pelaais veur zokzulm. ⁰¹Hai haar seuventegdoezend sjaauwerlu aan t waark, tachtegdoezend stainhaauwers veur in de baargen en zèsendatteghonderd opzichters over t waarkvolk. ⁰²Salomo stuurde n bosschop noar Churam, keunenk van Tyrus: “Dou mien voader doudestieds veur zokzulm n pelaais baauwen wol, heb ie hom cederstammen leverd. ⁰³Nou goa ik n hoes baauwen veur de noam van de HEER, mien God. Dat hoes wil ik aan hom touwijden; ik wil der geurege wierook in zien aanwezeghaid branden; ik wil der op vaaste tieden teunbroden hènleggen en smörgens en soavends brandovvers brengen. Zoks wil ik doun op de sabbatdoagen, bie nijmoanfeesten en bie de hoge feesten van de HEER, ons God, zo as dat veur Israël veur aaltied onnaaierd is. ⁰⁴t Hoes dat ik baauwen goa, mout groot wezen, ons God is ja de grootste van ale goden. ⁰⁵Mor wèl is nou in stoat om veur hom n hoes te baauwen. De hemel, alderdeegs de hoogste hemel kin hom nait bevatten. En wèl bin ik den, dat ík veur hom n hoes baauwen zol, behaalve den om wierook in zien aanwezeghaid te branden? ⁰⁶Stuur mie den toch n meestervakman, n boaskerel dij kloar is in t waark mit gold en zulver, mit brons en iesder, dij bekwoam is in t vaarven van roodsangen, blaauwsangen en helderrode wol, dij t holtsnieden in de vingers het en dij soamenwaarken kin mit de vaklu hier in Juda en Jeruzalem, dij nog deur mien voader David aannomen binnen. ⁰⁷Lever mie den ook cederstammen, ciprezzen en sandelholt van de Libanon. Ik wait ja dat joen waarkvolk op Libanonbaargen kloar volk is in t holtkappen, en mien waarkvolk kin joen volk helpen, ⁰⁸zodat ik n hail bult holt in veurroad krieg, want tempel dij ik baauwen goa, mout groot worden en wonderboarliek mooi. ⁰⁹Ik zel joen waarkvolk, de holtkappers, etendrinken oetlangen: twinnegdoezend kor waaitenmeel, twinnegdoezend kor gaarst, wieder twinnegdoezend bat wien en twinnegdoezend bat eulie.”