17 Dou Jezus wiederging noar Jeruzalem tou, nam hai de twaalm apaart bie hom en zee onderwegens tegen heur:
18 “Zo as ie zain, bin we op pad noar Jeruzalem. Doar zel Menskenzeun aan hogepriesters en schriftgeleerden oetleverd worden. Ze zellen hom tou dood veroordailen,
19 en aan haaidens oetlevern. Dij zellen hom oetsliepen, giezeln en aan t kruus sloagen. Mor op daarde dag zel e opwekt worden.”
20 Zebedeüs zien vraauw kwam mit heur zeuns noar hom tou. Ze vuil veur hom op knijen om hom wat te vroagen.
21 “Wat kin ik veur joe doun?” vruig Jezus heur. “Beloof mie,” zee ze, “dat mien baaide jonges noast joe zitten zellen in joen keunenkriek: ain aan joen rechter- en ain aan joen linkerzied.”
22 “Ie waiten nait woar ie om vroagen,” antwoordde Jezus. “Kin ie oet beker drinken doar ik oet drinken mout?” “Joa,” zeden ze, “dat kin we!”
23 Hai zee tegen heur: “Mien beker zel ie wel drinken, mor rechts en links van mie zitten dat heb ik nait veur t zeggen. Doar kommen te zitten veur wèl mien Voader dat regeld het.”
24 Dou dij tien aandern dat heurden, aargerden ze zok aan baaide bruiers.
25 Mor Jezus raip heur bie zok en zee: “Ie waiten dat volken heur laaiders over heur de boas speulen en dat grode heren heur macht vuilen loaten.
26 Zo zel bie joe t nait wezen. Krekt aansom! Wèl maank joe grootste worden wil dij zel joen knecht wezen,
27 en wèl maank joe eerste worden wil dij mout elk aander veurgoan loaten.
28 Menskenzeun is ja nait kommen om zok bedainen te loaten, mor om te dainen en zien levent te geven as lösgeld veur veul mensken.”
29 Dou zai tou Jericho oetgingen, laip n grode koppel volk achter hom aan.
30 En joawel hur, twij blinden aan kaant van weg, heurden hom verbie goan en raipen: “Heer, Zeun van David, heb meedlie mit ons!”
31 t Volk graauwde heur tou: “Hol joe toch stil!” Mor ze begunden nog veul haarder te bèlken: “Heer, Zeun van David, heb meedlie mit ons!”
32 Jezus bleef stoan, raip heur en zee: “Wat kin ik veur joe doun?”
33 “Dat ons ogen weer opengoan, Heer!”
34 Jezus kreeg mit heur te doun en kwam heur ogen aan. Op slag konden ze weer kieken en gingen mit hom wieder.