t Evengelie volgens Matteüs 22: 1-14

⁰¹Jezus sprak vannijs tegen heur in geliekenizzen:
⁰²“t Hemels keunenkriek liekt hier op: der was ais n keunenk dij veur zien zeun n bruloft regelde.
⁰³Hai stuurde zien knechten der op oet. Dij zollen, dij e veur bruloft nuigd haar, oproupen. Mor ze wollen nait kommen.
⁰⁴Vannijs stuurde hai aander knechten der op oet. Dij zollen tegen lu dij nuigd wazzen, zeggen: ‘Kiek ais, ik heb t feest veur joe kloar! Bollen en vedde kaalver binnen slacht. Ales is veurmekoar. Kom op bruloft.’
⁰⁵Mor ze deden of ze niks heurden. Elkenain ging vot, ain noar zien laand tou, d’aander noar zien affeer.
⁰⁶Der wazzen ook nog gounent, dij grepen knechten beet, tiggelden heur òf, joa, sluigen heur dood.
⁰⁷Keunenk wer hoagels. Hai stuurde zien soldoaten der op òf en luit moordenoars ombrengen. Heur stad stook e in brand.
⁰⁸Dou zee e tegen zien knechten: ‘Ales was kloar veur bruloft, mor dij nuigd binnen, wazzen t nait weerd.
⁰⁹Goa op kruuspunten stoan en nuig elkenain dij ie mor vinden kinnen.’
¹⁰ Knechten gingen stroat op en brochten elkenain mit dij ze mor vinden konden: minnen en besten – t was heur netgliek. Al gaauw zat feestzoal vol mensken.
¹¹ Dou keunenk zoal in kwam om ais te kieken noar gasten aan toavel, zag e ain zunder bruloftsklaaieroazie.
¹² Hai zee tegen hom: ‘Mien laive man, hou bistoe zunder bruloftsklaaier aan hier heer kommen?’ Doar wos man niks op te zeggen.
¹³ Dou zee keunenk tegen zien bedaindes: ‘Knevel hom handen en vouten en smiet hom der oet, in t duustern. Doar zellen ze hoelen en mit tanden knaarzen!’
¹⁴ Hail veul binnen ja roupen, mor oetkeurd binnen der mor n poar!”