Psaalm 63

⁰⁰¹n Psaalm van David, dou hai touhuil in woestijn van Juda.

⁰⁰²God, mien God bin ie, ik zuik noar joe,
mien ziel smacht noar joe,

mien liggoam longert noar joe

in n dreug en dörsteg laand zunder wotter.

⁰⁰³Vandoar dat ik in t haailegdom joe zag,
joen macht en joen glorie.

⁰⁰⁴Joen traauwe laifde is beter as t levent,
mien lippen priezen joe.

⁰⁰⁵Joe wil ik priezen zo laank as ik leef,
in joen noam mien handen omhoog steken.

⁰⁰⁶Den eet ik mie zat in maarg en vet,
en mien lippen jubeln t oet.

⁰⁰⁷As ik op bèr lig, denk ik aan joe,
bie naacht miemer ik over joe.

⁰⁰⁸Want ie hebben mie hulpen,
ik jubel in schaar van joen vleugels.

⁰⁰⁹Mit haart en ziel hang ik aan joe,
joen rechterhaand holdt mie vaast.

⁰¹⁰ Lu dij mie noar t leven stoan,
loat dij daip onder grond terecht kommen,

⁰¹¹ dij mie aan t sweerd overgeven willen,
loat dij t mit jakhaalzen te doun kriegen.

⁰¹² Keunenk zel blied wezen over God,
elk dij hom traauw sweert, mag zok gelokkeg priezen,

want mond van leugenders wordt dichtstopt.