t Evengelie volgens Matteüs 20 : 1-16

⁰¹t Hemels keunenkriek is ja te vergelieken mit n hereboer dij der smörgensvroug op oetging om aarbaiders veur zien droevetoen te huren.
⁰²Dou e t mit aarbaiders aineg worden was veur n schellenk doags, stuurde hai heur noar zien droevetoen.
⁰³Om en bie t daarde uur ging e weer op pad en zag op maart nog aander manlu stoan dij niks om handen haren.
⁰⁴‘Kom ook mor in mien droevetoen aarbaiden,’ zee e tegen heur. ‘k Zel joe geven wat recht is.’
⁰⁵Zai gingen der hèn. Om t zèsde en t negende uur ging e weer noar boeten tou en dee krekt zo.
⁰⁶t Was rond t elfde uur dou e weer op stroat ging en nog gounent stoan zag, ‘Woarom verdoun ie hier haile dag mit niks doun?’ vruig e.
⁰⁷‘Gainain het ons aannomen,’ zeden ze. ‘Nou, goa den ook mor noar mien droevetoen,’ zee e.
⁰⁸Tegen oavend zee boas van droevetoen tegen opzichter: ‘Roup aarbaiders mor en betoal heur t loon oet. Lesten t eerst!’
⁰⁹Aarbaiders dij om en bie t elfde uur aannomen wazzen, beurden n schellenk de man.
¹⁰ Dou eersten aan bòd kwammen dochten ze, ze zollen meer kriegen. Mor zai beurden ook n schellenk de man.
¹¹ Dou ze dij oetbetoald kregen, begunden ze tegen boer te vrantern.
¹² ‘Dijent doar, dij t lest kommen binnen, hebben mor n uur wat doan. En toch heb ie heur krekt zoveul geven as ons! En wie hebben der haile dag haard veur pokkeln mouten – in aal dij hetten!’
¹³ Mor hai zee tegen ain van dij lu: ‘Mien laive man, ik dou die toch gain onrecht? Heb wie gain schellenk as daghuur akkedaaierd?
¹⁴ Pak den aan wat of die toukomt en goa noar hoes tou. Ik wil dizze lesten krekt zoveul geven as die.
¹⁵ Mag ik sums nait mit mien geld doun wat of k wil? Of trek ie zo’n zoer gezicht omdat ik rejoal bin?’
¹⁶ Doarom zellen lesten, eersten en eersten, lesten wezen.”