Ezechiël 12:1-7

⁰¹Ik kreeg dit woord van de HEER:
⁰²“Manmensk, doe woonst middenmaank n rebels volk. t Het ogen om te kieken, mor t zugt niks en oren om te heuren, mor t lustert nait: t is nou ainmoal n rebels volk.
⁰³Pak doarom, manmensk, zoveul bie nkander astoe neudeg bist om in ballengschop te goan. Goa bie dag vot, dat elk t zain kin. Ze mouten zain, dastoe oet dien loug vandoan in ballengschop gaaist, woaraarns aans hèn. Meschain dat ze den, hou rebels of ze ook binnen, heur ogen bruken goan.
⁰⁴Breng ales wastoe as balleng neudeg bist overdag noar boeten tou en goa zulm soavends noar boeten, ofst in ballengschop gaaist. Zörg der veur dat ze zain kinnen, wast dust.
⁰⁵Zörg, dat ze zain dastoe n gat in muur van dien hoes moakst om dien pakkeloazie noar boeten te brengen.
⁰⁶Pak, doar zai bie binnen, dien pakkeloazie op nek en droag ales in t duustern weg. Most dien gezicht ofdekken, dast laand om die tou nait meer zain kinst. Wastoe dust zel n taiken wezen veur t volk van Israël!”
⁰⁷Ik dee persies wat mie besteld was. Overdag brochde ik ales noar boeten tou wat ik as balleng neudeg was, en soavends muik ik mit handen n gat in muur. Dou t haildaal duuster was, pakte ik ales op nek en druig t vot. Ondertussen keek t volk tou.