Ezechiël 18 :1-9

⁰¹Ik kreeg dit woord van de HEER:
⁰²“Hou kom ie der bie in Israël dit taimke te bruken: As olders gruine droeven eten, kriegen kinder slije tanden?
⁰³Zo woar as ik leef – zegt God, de HEER – nooit meer mag ain bie joe in Israël dit taimke nog in mond nemen!
⁰⁴Aal menskenlevents binnen mienent ja: olders heur levent en kinder heurent liggen in mien haand. En allenneg dij zundegt, zel staarven.

⁰⁵Stel, ain is rechtveerdeg. Hai is mie traauw en dut t goie.
⁰⁶Aan ovvermoalen op baargen dut e nait mit en hai het gain oog veur drekgoden van t volk van Israël, hai moakt aandermans vraauw nait onraain deur zok aan heur te vergriepen en hai het gain omgang mit n vraauw dij de regels het,
⁰⁷hai knipt gainent oet, geft schuldenoar zien paand weerom en besteelt gainent. Dij honger het, geft e zien gerak, dij noakend is, zet e in klaaier,
⁰⁸hai vragt gain rente as e geld oetlaint of weeromkrigt, hai begaait gain onrecht en geft n eerlek oordail bie verschil van mainen tussen ain en aander,
⁰⁹hai holdt zok aan mien geboden en leeft echt noar mien veurschriften. Zokkent is rechtveerdeg en zel zekerwoar in leven blieven – zegt God, de HEER.