t Evengelie volgens Matteüs 22: 23-33

²³ Aigenste dag stapten Sadduceeërs op hom òf. Dat binnen lu dij ontstrieden dat doden weer opstoan.
²⁴ “Meester,” zo begunden ze, “Mozes het toch zegd: ‘As n traauwd man oet tied komt zunder kinder, den mout zien bruier wedevraauw traauwen. Dij kin der den veur zörgen dat zien overleden bruier toch noazoaten krigt.’
²⁵ Nou wazzen der bie ons ais zeuven bruiers. De eerste traauwde en kwam oet tied. Omdat hai gain kinder haar, kwam zien vraauw aan zien bruier.
²⁶ Zo ging t ook mit twijde, mit daarde, joa, mit ale zeuven.
²⁷ Op t leste kwam vraauw ook oet tied.
²⁸ As ze nou oet dood opstoan, wèl zien vraauw zel zai den wezen? Ze hebben ja ale zeuven mit heur traauwd west!”
²⁹ “Ie zitten der haildaal noast!” was Jezus zien antwoord. “Dat komt omdat ie de Schriften nait kennen en God zien macht ook nait.
³⁰ As doden opstoan, traauwen manlu en vraauwlu ja nait mitnkander. In hemel binnen mensken ja net as engels.
³¹ En wat opstoan oet doden aanbelangt: heb ie nait lezen wat God tegen joe zegd het:
³² ‘Ik bin Abraham zien God, Isaak zien God en Jakob zien God?’ Hai is gain God van doden mor van leventegen.”
³³ Dou t volk dat heurde, stonden ze versteld van wat hai heur leerde.