t Evengelie volgens Matteüs 15 : 21-28

²¹ Jezus ging doarvandoan en week oet noar kontrainen van Tyrus en Sidon.
²² En loat doar nou n vraauw oet dij buurt, oet Kana, noar boeten tou kommen. “Heer, Zeun van David!” raip ze. “Heb meedlieden mit mie! Mien wichtje het slim van n kwoaie gaist te lieden.”
²³ Mor hai dee der gain woord tou. Zien leerlingen kwammen der bie en vruigen hom: “Dou toch wat of ze vragt! Den bin we van dat gezoes òf!”
²⁴ Hai antwoordde: “Ik bin bloots noar verloren schoapen van t volk Israël toustuurd.”
²⁵ Mor vraauw ging veur hom op knijen liggen. “Heer, help mie toch!” zee ze.
²⁶ Hai zee tegen heur: “t Is nait goud, kinder heur brood òf te pakken en t jonge hondjes tou te smieten!”
²⁷ “Toch wel, Heer,” zee ze, “lutje hondjes kriegen krummels toch te vreten dij van boas zien toavel ofvalen.”
²⁸ “Vraauw,” zee Jezus tegen heur, “wat heb ie n groot vertraauw! t Zel zo wezen, zo as ie geern willen!” En heur dochter wer beter van dat aigenste ogenblik òf.