Braif aan Romaainen 9 : 19-29

¹⁹ Nou zel ie tegen mie zeggen: “Wat het e den nog te mòtjen? Het ooit ain tegenholden, wat of hai wol?”
²⁰ Mor man! Wat verbeeldstoe die wel dastoe God in mond zitten duurst? Wat ain oet handen komt, zegt toch nait tegen wèl of t moakt het: “Woarom muikstoe mie nou zó?”
²¹ Is poddebakker sums gain boas over zien klaai? Mag e nait oet aigenste klaaikloet ain pot moaken veur pronk en n aander veur ombaalgen?
²² Stel nou ais: God wol geern zain loaten hou kwoad of e was en vernemen loaten, hou machteg; mor luit toch dij potten doar e kwoad op was, nog geworden, schoon dat ze der aan tou wazzen kepot gooid te worden. Zoveul geduld haar e!
²³ En as e dat den ook nog doan het om zain te loaten mit houveul eer hai dij potten, doar e meedlieden mit haar, overloaden wol? Veur dij eer haar e ze vrouger al bestemd,
²⁴ mor nou het e ze der ook tou roupen, nait allenneg oet Jeuden, mor ook oet haaidens. En dij potten dat bin wie!
²⁵ Zo zegt e ook bie Hosea: “Den zel ik wat mien volk nait was: ‘mien volk’ nuimen, en t wicht dij k nait lieden mog: ‘mien laiverd.’
²⁶ Op t stee doar heur zegd was: ‘Ie binnen mien volk nait!’ doar zellen ze nuimd worden: ‘kinder van God dij leeft.’”
²⁷ En Jesaja ropt t over Israël oet: “Of binnen Israël zien zeuns in mennegte ook aan t zeezaand geliek, toch is t mor n stattje dat red worden zel.
²⁸ Wat of de Heer aanzegd het, zel e doun op wereld; hai nemt de kòrtste weg en moakt doan waark.”
²⁹ t Is krekt as Jesaja eerder zegd het: “As de Heer, dij over zo’n troepenmacht beschikt, ons gain kinder overloaten haar, zol wie as Sodom worden wezen, aan Gomorra geliek.”