t Evengelie volgens Matteüs 13:1-12

⁰¹Op dij dag ging Jezus tou t hoes oet en ging aan t meer zitten.
⁰²Der kwam zo’n koppel volk om hom toustoan dat e in n boot stapte. Doar ging e in zitten en aal t volk bleef op kaant van waal stoan.
⁰³Hai vertelde heur veul en bruukte doarbie geliekenizzen: “Der was ais n boer dij ging aan t zaaien.
⁰⁴Bie t zaaien vuil n dail bie t pad langs. Dou kwammen der vogels aan en dij pikten t op.
⁰⁵n Aander paart kwam in staingrond te laande. Doar lag mor n beetje eer. t Zoad kwam al gaauw op: t lag ja nait daip.
⁰⁶Mor dou zun opkommen was, verschruide en verdreugde t, omreden t haar ja gain worrels zet.
⁰⁷Weer n aander dail vuil maank stiekels. Dij kwammen tougelieks op en smoorden t zoad.
⁰⁸Weer n aander dail vuil in goie grond. Dou dat opkommen was, smeet t honderd, sesteg of dattegmoal zoveul op.
⁰⁹Wèl oren het, mout ter ook mit lustern!”

¹⁰ Leerlingen kwammen Jezus vroagen: “Woarom bruuk ie geliekenizzen as ie mensken toutoalen?”
¹¹ Hai antwoordde heur: “Joe is t gund gehaaimen van God zien riek te kennen, mor heur nait.
¹² Wèl ja wat het, krigt nog tou, zodat e meer as zat het. Mor wèl niks of naks het, dij zel ook nog ofpakt worden wat of e het.