t Evengelie volgens Matteüs 21 : 1-9 (Paalmzundag)

⁰¹Ze kwammen stoef bie Jeruzalem, in Betfage, bie Olievenbaarg. Jezus stuurde twij van zien leerlingen der op oet mit bosschop:
⁰²“Goa noar t loug hier tegen joe over. Doar zel je al gaauw n ezel mit n vooltje zain. Ze binnen vastbonden. Moak dij lös en breng ze bie mie.
⁰³En as ain joe der over aansprekt, zeg den: ‘De Heer mout ze bruken. Hai zel ze votdoalek weerombrengen loaten.’”
⁰⁴Zo mos oetkommen wat of profeet zegd het:
⁰⁵“Zeg tegen dochter van Sion: ‘Joen keunenk komt noar joe tou, zaachtmoudeg is e en hai zit op n ezel, op n vool, t jong van n waarkdaaier.’”

⁰⁶Leerlingen gingen der op oet en deden zo as Jezus heur besteld haar.
⁰⁷Ze nammen ezel en t vooltje mit. Dou legden ze heur mantels der over hèn en Jezus ging der op zitten.
⁰⁸n Haile koppel volk vlijde heur mantels op weg. Aander lu haauwden takken van bomen òf en spraaidden dij op t pad.
⁰⁹t Volk dat veur hom oetlaip en dat achter hom aan ging, raip: “Hosanna, Zeun van David! Zegen over hom dij komt in de Heer zien noam. Hosanna in hemel!”