Hebreeën 7:20-28

²⁰ En der kwam nog ais n dikke aid bie. Dij aandern werden priester zunder dat ter n aid bie te pas kwam.
²¹ Mor dou hai priester wer, legde God aid òf. De Heer het sworen, en t zel hom nait muiten: “Ie binnen priester veur aiweg en aaid.”
²² En zo staait Jezus börg veur n verbond dat veul beter is.
²³ Der is nog n verschil: van dij aander priesters binnen der n haile bult. Dat komt omdat dij staarven mouten en nait veur aiweg priester wezen kinnen.
²⁴ Mor deurdat hai aaltied leven blift, gaait zien priesterschop op gainain aander over.
²⁵ Doarom kin hai mensken dij deur hom noar God tou goan, ook veur aaid redden. Hai leeft ja aaltied om veur heur n goud woord te doun.
²⁶ Zo’n hogepriester, doar haar we nou net verlet om: haaileg, zunder lek of brek, ain dij niks mit zundoars te doun het, hoog boven ales verheven.
²⁷ Dij aander hogepriesters mozzen elke dag eerst ovvers brengen veur heur aigen zunden en den veur t volk heurent. Dat huift hai nait: hai het dat veur ainmoal en aaltied doan dou e zokzulm ovverde.
²⁸ Wet moakt ja lu tou hogepriester dij ook mor mensken binnen: mor aid, dij noa t in kracht treden van wet oetsproken is, dij stelt de Zeun aan: volmoakt is e, veur aiweg en aaid.