Braif aan Romaainen 7 : 13-25

¹³ Is t goie den mien dood worden? Nee hur: zunde! En dat was om heur as zunde in de kiekerd lopen te loaten, deurdat ze mie mit t goie de dood dee. Zo zol deur t gebod dudelk worden, hou deurtrapt zundeg dij zunde wel is.
¹⁴ Wie waiten dat wet van Gods Gaist komt. Mor ik bin bloots n zundeg mensk, verkocht aan zunde.
¹⁵ Ik begriep mien aigen doun en loaten nait. Ik dou ja nait wat of ik veur haar, nee, mor doar k n ofgriezen van heb, dát dou k juust.
¹⁶ As ik nou dou wat of ik ainlieks nait veur heb, geef ik toch zulm tou: wet het t bie t goie èn.
¹⁷ Mor nou bin ik t ainlieks nait meer dij t dut, mor zunde dij in mie touholdt.
¹⁸ Ik wait ja mor aal te goud dat in mie, dat is in mien noatuur, niks gain gouds woont. t Goie wíllen, dat lokt mie wel zo’n beetje, mor t ook doun … ho mor!
¹⁹ Ja nait wat ik wil, dou ik: t goie; mor wat ik nait wil, t verkeerde, dat heb ik bie t èn.
²⁰ Mor as ik nou dou wat ik ainlieks nait wil, den bin ik t zulm nait meer dij t dut, mor zunde dij in mie woont, dij dut dat.
²¹ Zo is dit mien ondervinden: as k t goie doun wil, komt krekt t verkeerde der oet.
²² Ik vernuver mie vanbinnen over Gods wet,
²³ mor in mien doun en loaten ontdek ik n aander wet. Dij is in stried mit wet dij ik innerliek aannomen heb, en speult mie in handen van wet van zunde dij in mie leeft.
²⁴ Wat bin ik toch n ongelokkeg stok mensk! Wèl zel mie vrijmoaken oet dit bestoan doar dood boas over is?
²⁵ Daank aan God! Dat dut Jezus Christus, ons Heer!
²⁶ Zo is t nou den: zulm dain ik mit mien verstand Gods wet, mor in mien doun en loaten geef ik mie over aan wet van zunde.