1 Samuël 8 : 1-9

⁰¹Dou Samuël old wer, stelde hai zien zeuns aan as rechter over Israël.
⁰²Oldste haitte Joël en twijde Abia. Zai wazzen rechter in Berseba.
⁰³Mor zien zeuns deden aans as hai. Zai wollen der zulm beter van worden. Zai luiten zok omkopen en nammen t mit t recht nait zo naauw.
⁰⁴Doarom kwammen oldsten van Israël bie nkander en gingen noar Samuël in Rama tou.
⁰⁵“Heur ais,” zeden ze tegen hom, “Ie binnen al old en joen zeuns nemen gain veurbeeld aan joe. Dat stel n keunenk over ons aan, dij ons regaaiert, krekt as ale aander volken.”
⁰⁶Samuël von t aldernoarst dat zai zeden: “Geef ons n keunenk dij ons regaaiert.” Doarom beedde hai tou de HEER.
⁰⁷Dij zee tegen hom: “Luster noar t volk in aal dat t joe te zeggen het. Zai hebben joe ja nait aan kaant zet, mor mie. Ik heb as keunenk bie heur ofdoan.
⁰⁸Net zo as t goan is bie aal dat zai deden van dag òf dat ik heur oet Egypte brocht heb aan dizze dag tou. Zai hebben mie ja verloaten en aander goden daind. Zo doun ze nou ook mit joe.

⁰⁹Ie mouten wel noar heur lustern, mor heur goud woarschaauwen. Moak heur dudelk wat n keunenk, dij over heur regaaiern zel, veur rechten het.”