Jesaja 8:1-10

⁰¹De HEER zee tegen mie: “Pak n groot schriefbred en schrief doar in dudelke letters op: Raproofd -Vlugverdaind.”
⁰²Ik huil der twij betraauwboare getugen bie, priester Uria en Zecharja, zeun van Jeberechjahu.
⁰³Dou slaip ik mit profetenvraauw. Dij kwam in verwachten en kreeg n zeun. De HEER zee tegen mie: “Nuim hom: Raproofd – Vlugverdaind.
⁰⁴Want veur en aleer t jong pap en mam zeggen kin, hebben ze riekdom van Damascus en t roofgoud van Samaria noar keunenk van Assyrië brocht.”

⁰⁵De HEER zee nog meer tegen mie:
⁰⁶“Omdat dit volk t kaalm kabbelnde wotter van Siloäch niks in reken het en baang is veur Resin en veur Remaljahu’s zeun,
⁰⁷doarom let de HEER over heur hèn broezen t machtege en geweldege wotter van de Eufraat – keunenk van Assyrië mit zien haile macht -. t Golft over ale walen hèn, t stroomt aan ale kanten over,
⁰⁸t stört zok op Juda en overspoult t laand, aal wieder, aan haals tou, joa, mit wiede vleugels bedekt t joen laand, zo laank en braid as t is. O, Immanuël!

⁰⁹Volken, bèlkt t mor oet: Aanvalen! Mor schrik vaalt joe op hoed. Luster mor goud, ale oethouken van eerde! Moak joe mor kloar – schrik vaalt joe op hoed! Moak joe mor kloar – schrik vaalt joe toch op hoed!
¹⁰ Bedenk mor plannen – der komt niks van, moak mor ofsproaken – t hoalt toch niks oet, want God-is-mit-ons!”