Jesaja 7 :1-9

⁰¹In tied dat Achaz, Jotams zeun en klaainzeun van Uzzia, keunenk van Juda was, trok Resin, keunenk van Aram en Pekach, ain van Remaljahu, en keunenk van Israël, tegen Jeruzalem op om der tegen te vechten. Mor hai kon stad nait verovern.
⁰²Dat wer deurgeven aan t hoes van David. Men zee: “Arameeërs stoan al in Efraïm!” Dou sluig hom schrik om t haart en keunenk en zien volk trilden, zo as bomen in t bos stoan te trillen van wind.
⁰³Mor de HEER zee tegen Jesaja: “Goa tou stad oet, doe en dien zeun Sear-Jasub, Achaz in muit op weg noar t Blaikveld, aan t èn van wotterlaaiden van Bovenviever.
⁰⁴Mos tegen hom zeggen: ‘Neem joe in acht! Wees kaalm, loat joe nait oet stuur brengen deur dij baaide kwaalmende stokken branholt, deur dij Resin van Aram en deur Remaljahu’s zeun, hou glìn in hoed ze ook binnen.
⁰⁵Loat Aram, Efraïm en Remaljahu zien zeun mor plannen opbedenken en zeggen:
⁰⁶“Optrekken wil we tegen Juda, heur schrik op hoed joagen, heur verroppen! En zeun van Tabeël zel we doar keunenk moaken.”
⁰⁷Zo zegt God, de HEER: Gain sproake van! Doar komt niks van in!

⁰⁸Al is Damascus hoofdstad van Aram en Resin boas van Damascus,
⁰⁹al is Samaria hoofdstad van Efraïm en Remaljahu’s zeun boas van Samaria: binnen vievensesteg joar is t doan mit Efraïm, der is gain volk meer over. Leuf ie nait, den blief ie nait!’”