12 Dou t dag wer, stoken Jeuden koppen bie nkander. Ze zeden: “Wie maggen vervlökt wezen as wie eten of drinken, veurdat wie Paulus ombrocht hebben!”
13 Meer as vatteg man deden aan dit komplöt mit.
14 Ze gingen noar opperpriesters en road tou en zeden: “Wie hebben n vluik over ons inroupen as wie eten of drinken zellen, veurdat wie Paulus doodmoakt hebben.
15 Nou mout ie mit t Sanhedrin, kommedant waiten loaten dat e Paulus bie joe brengen let. En den net doun of ie zien zoak beter onderzuiken willen. Wie binnen der kloar veur hom van kaant te moaken, veurdat e aankomt.”
16 Mor zeun van Paulus zien zuster heurde van dizze hinderloag. Hai ging der op òf, laip kezèrn in en vertelde t aan Paulus.
17 Dij raip ain van ofsieren en zee: “Breng dizze jong noar kommedant tou. Hai het n bosschop veur hom.”
18 Dij nam hom mit en brochde hom bie kommedant. “Arrestant Paulus het mie roupen,” zee e, “en op zien verzuik breng k dizze jongkerel bie joe. Hai het joe wat te vertellen.”
19 Kommedant pakte hom bie haand, nam hom apaart en zee: “Wat hestoe mie te zeggen, mien jong?”
20 Hai zee: “Jeuden hebben ofsproken joe te vroagen Paulus mörgen veur road te brengen. t Sanhedrin zol zo te reken naauwkeureger inlichtens over hom hebben willen.
21 Mor loat joe nait omproaten. Meer as vatteg man loeren op hom. Ze hebben n vluik over zok inroupen as ze wat eten of drinken, veurdat ze hom ombrocht hebben. Ze stoan alderdeegs al kloar en t wachten is allenneg op joen toustemmen.”
22 Kommedant luit dij jongkerel goan mit opdracht: “Zeg tegen gain mensk dastoe mie dit verteld hest.”