Jesaja 7: 18-25

¹⁸ Dij dag zel de HEER muggen bie nkander floiten bie oetènnen van Egyptes revieren, en iemen in t laand van Assyrië.
¹⁹ Altmoal kommen ze der aan en strieken deel in kloven van baargen, in spleten van rotsen, op ale stiekelbozzen en bie ale drinkeldòbben.
²⁰ Dij dag huurt de Heer n scheermès: keunenk van Assyrië aan aanderkaant Eufraat – scheert ale hoar òf, van kop tou toon, alderdeegs board gaait ter schoon òf!
²¹ Dij dag holden ze n veers en n poar schoapen.
²² Ze zellen zo veul te mèlken hebben, dat men botter eten kin. Botter en hunneg dat zel elk ja eten dij overbleven is in t laand.
²³ Dij dag zel elke lap grond doar doezend droevebozzen stoan, doezend zulverstokken weerd, vol wezen mit roegte en roet.
²⁴ Allenneg mit pielenboog is ter deurkommen aan, t haile laand zel ain roegte en roet wezen.
²⁵ Aal t laand in baargen, vrouger mit haauw bewaarkt, men komt ter nait meer, benaauwd veur roegte en roet. t Vij drift men der in, schoapen poazen t plat.