30 Toch wol e wel ais persies waiten woar of e deur Jeuden van beschuldegd wer. Doarom luit e hom aanderdoags tou t gevang oethoalen. Opperpriesters en haile road gaf e odder bie nkander te kommen. Dou luit e Paulus doar ook hènbrengen en bie heur veurlaaiden.
01Paulus nam t Sanhedrin ais goud op. Dou zee e: “Bruiers, aan vandoag tou het mien optreden zo west, dat ik veur God n haildaal goud gewaiten heb.”
02Dou gaf opperpriester Ananias lu dij noast hom stonden odder hom op mond te sloagen.
03“God zel joe sloagen,” zee Paulus dou tegen hom, “witkaalkte muur! Ie zitten doar om volgens wet over mie recht te spreken en ondertussen geef ie tegen wet in, odder mie te sloagen.”
04“Duur ie God zien opperpriester oet te schelden?” zeden omstanders tegen hom.
05Dou zee Paulus: “Dat wos ik nait, bruiers, dat hai opperpriester is. Der staait ja: ‘Van n laaider van joen volk zel ie gain kwoad spreken.’”
06Nou wos Paulus, dat t aine dail bie Sadduceeërs en t aander dail bie Farizeeërs heurde. Doarom raip e in vergoadern: “Bruiers, ik bin n Farizeeër en heb bie Farizeeërs in leer west. Ik wor berecht om dat, doar of wie noar oetzain: dat doden opstoan.”
07Mit dat e dat zee, kregen Farizeeërs en Sadduceeërs t mitnkander aan stòk. t Gezelschop kwam in twijen te liggen.
08Sadduceeërs zeggen ja dat ter gain opstanden is en dat ter gain engel of gaist bestaait. Mor Farizeeërs holden aan dij baaide leerstokken vaast.
09n Keboal dat t wer! n Stokkewat Farizeeërs kwammen in t èn en bleven mor volholden: “Wie kinnen niks verkeerds in dizze man vinden! En as ter nou n gaist wat tegen hom zegd het, of n engel?”
10 Dou t zo’n dikke roezie wer, wer kommedant baang dat ze Paulus verscheuren zollen. Dat hai gaf soldoaten odder ommeneden te kommen en hom gaauw tussen heur vandoan te hoalen en noar kezèrn te brengen.
11 Snaachts doarop kwam de Heer bie Paulus stoan en zee: “Hol moud! Net zo astoe Jeruzalem bosschop over mie op t haart bonden hest, zo mostoe dat ook in Rome doun.”