t Evengelie volgens Lucas 20 : 1 – 8

⁰¹Op ain van dizze doagen gaf e t volk weer onderricht in tempel en hai verkundegde bliede bosschop. Dou kwammen opperpriesters en schriftgeleerden mit oldsten op hom òf en ze zeden tegen hom:
⁰²“Zeg ons ais, wat veur recht heb ie om dat te doun. En wèl het joe t recht doartou geven?”
⁰³Hai gaf heur as antwoord: “Ik wil joe ook wat vroagen.
⁰⁴Zeg ie mie mor es: Johannes zien deup, woar kwam dij heer: van hemel of van mensken?”
⁰⁵Ze onnaaierden onder nkander: “As wie zeggen ‘Van hemel,’ zel hai zeggen: ‘Woarom wol ie hom den nait leuven?’
⁰⁶Mor as wie zeggen: ‘Van mensken,’ den zel aal t volk hier ons mit stainen doodgooien. Ze binnen der ja van overtuugd: Johannes was n profeet!”
⁰⁷Dou zeden ze, ze wozzen nait woar of dij heer kwam.
⁰⁸Jezus zee tegen heur: “Den zeg ik joe ook nait mit wat veur recht of ik dit dou!”