Handelingen van apostels 24 : 10-21

¹⁰ Dou goeverneur hom mit n knik bedud haar dat e t woord nemen mog, ging Paulus der zo op in: “Ie spreken al joaren laank recht over dit volk. Dat wait k en doarom plaait ik vol goie moud veur mien zoak.
¹¹ Ie kinnen ja noagoan dat t nog mor twaalf doag leden is dat ik weer in Jeruzalem kwam om God aan te beden.
¹² Dat ik mit ain in diskuzzie was of n volksoploop veroorzoakte, doar hebben ze mie nait op trappaaierd: in tempel nait, in sinagoges nait, in stad nait.
¹³ Net zo min kinnen ze joe bewiezen overleggen van dat, doar of ze mie nou van beschuldegen.
¹⁴ Bekennen wil k joe dit: volgens dij Weg, ‘sekte’ nuimen zai t, op dij menaaier, dain ik ons veurolders heur God. Evenzogoud leuf ik ales wat of mit wet overainstemt en in profeten heur bouken staait
¹⁵ en verwacht ik van God t zulfde wat of dizze manlu hier ook verwachten doun: dat ter n opstanden van rechtveerdegen en onrechtveerdegen wezen zel.
¹⁶ Wat dat aangaait dou k, net zo goud as zai, mien best altied n zuver gewaiten te holden veur God en mensken.
¹⁷ Noa verschaaiden joar bin k hier weeromkommen om goaven òf te droagen aan mien volk en ovvers te brengen.
¹⁸ Doar zagen ze mie in tempel mit aan gaang dou k mie zuvern loaten haar. Der was gain sproake van mennegte of rebulie om mie tou.
¹⁹ Der wazzen wel n poar Jeuden oet Asia bie … joa, ainlieks haren dij veur joe verschienen mouten om mie aan te kloagen, as ze wat tegen mie hebben.
²⁰ Of loaten aans dizze manlu zulm zeggen aan wat veur misdoad zai mie schuldeg vonden hebben dou k veur Hoge Road ston.
²¹ Of t mos al om dij aine oetsproak goan dij k ter oet gooide dou k middenmaank heur ston: ‘Over opstanden van doden stoa k vandoag veur joe terecht.’”