t Evengelie volgens Lucas 18: 18-30

¹⁸ n Veuraanstoand man vruig hom: “Goie meester, wat mout ik doun om t aiwege levent te aarven?”

¹⁹ Jezus zee tegen hom: “Woarom nuim ie mie goud? Gainain is goud, allain God.
²⁰ Ie kennen geboden ja: ie zellen t nait mit n aander zien vraauw aanleggen, nait doodsloagen, nait stelen, gain vaalze verkloaren ofleggen, en ie zellen joen voader en moeke in eren holden.”
²¹ Hai zee: “Dat bin k al van jongs òf aan noakommen.”
²² Dou Jezus dat heurde, zee e tegen hom: “Nog ain ding ontbrekt joe. Verkoop aal wat ie hebben en verdail t onder aarme lu. Den zel ie n schat in hemel hebben. Kom den weer hier en goa mit mie!”
²³ Dou e dat heurde wer e kant sneu, omreden hai was schatriek.

²⁴ Jezus keek hom aan en zee: “Wat is t ja stoer veur mensken mit geld om in God zien riek te kommen.
²⁵ n Kemeel gaait makkelker deur t oog van n naal as dat n rieke in God zien riek komt!”
²⁶ Dij t heurd haren zeden: “Mor wèl kin den beholden worden?”
²⁷ Hai zee tegen heur: “Wat of mensken nait kinnen, kin God aal.”
²⁸ Petrus zee: “En wie den? Wie hebben aal onzent ter aan geven en binnen mit joe goan!”
²⁹ Hai zee tegen heur: “Ik verzeker joe: elkenain dij hoes of vraauw of bruier of olders of kinder verloaten het om God zien riek,
³⁰ dij krigt veul en veul meer weerom in dizze tied, en in toukomst t aiwege levent.”