22 Dou besloot Felix, schoon dat e oardeg goud van Weg op hoogte was, heur zoak te verdoagen. “Zo gaauw as kommedant Lysias komt, zel k in joen zoak oetsproak doun,” zee e.
23 Aan ofsier gaf e odder hom vaast te holden, mor onder licht arrest. Zien aigen volk mog e niks in weeg leggen as dij hom aargenswoar mit helpen wollen.
24 n Poar doag loater kwam Felix doar mit zien vraauw Drusilla. Dat was n Jeudske. Hai luit Paulus hoalen en lusterde noar wat of hai over t geleuf in Christus Jezus vertelde.
25 Mor dou e t ter over haar dat je rechtveerdeg leven mouten en joezulm onder bedwang holden en dat ter n oordail komt, kreeg Felix t benaauwd. “Goa mor eerst vot,” zee e, “as mie t oetkomt, zel k joe wel weer hoalen loaten.”
26 Ondertussen hoopte hai der op dat e geld van Paulus kriegen zol. Doarom luit e Paulus nog al gaauw ais bie zok kommen om mit hom te proaten.
27 Noa twij joar kreeg Felix as opvolger Porcius Festus. Om bie Jeuden in n goud bladje te kommen, luit Felix Paulus in t gevang zitten.