t Evengelie volgens Lucas 21: 5 – 19

⁰⁵Dou gounent van tempel zeden dat e mit mooie stainen en wijgeschenken versierd was, zee e:
⁰⁶“Wat of ie doar zain – der zel n tied kommen dat ter gain twij stainen opnkander blieven zellen. t Wordt aal mit grond slichtmoakt!”
⁰⁷Ze vruigen hom: “Meester, wanneer zel dit wezen? En woar kin we aan zain dat t ter op aan gaait?”
⁰⁸Hai zee: “Wees ter op verdocht en loat joe niks wiesmoaken. Mennegain zel kommen onder mien noam en zeggen: ‘Ik bin t!’ en ‘Tied is ter heer!’ Loop nait achter heur aan.
⁰⁹En as ie heuren van oorlogen en rebulie, loat joe doar nait baang veur moaken. Dij dingen mouten ja eerst gebeuren. Mor dat is t èn vot nog nait.”
¹⁰ Dou zee e tegen heur: “Volken en keunenkrieken zellen mitnkander sloags roaken.
¹¹ Der zellen swoare eerdbevens en nou hier en den doar pest en hongersnood wezen. Ook benaauwde dingen en geweldege taikens aan lucht zellen zok veurdoun.
¹² Mor veur t zo wied is, zellen ze joe oppakken en achter joe heerzitten en joe opbrengen in sinagoges en gevangenizzen, joe veur keunenks en stadholders laaiden, omreden ie kommen veur mie oet.
¹³ t Zel veur joe hier op oetlopen, dat ie getugen mouten.
¹⁴ Dou der den denk om dat ie nait in t veuren bedenken hou of ie joe verweren zellen.
¹⁵ Ik zel joe zokse wieze woorden in mond geven, dat joen tegenstanders doar niks tegen inbrengen kinnen.
¹⁶ Alderdeegs deur joen olders en bruiers en femilie en vrunden zel ie verroaden worden. Ze zellen gounent van joe doodmoaken.
¹⁷ Elkenain zel joe hoaten, omreden ie kommen veur mie oet.
¹⁸ Mor gain hoar van joe zel verloren goan.
¹⁹ Deur vol te holden, zel ie t levent ter òf redden.