t Evengelie volgens Lucas 19 : 1-10 (Dankdag veur t gewas)

⁰¹Dou e Jericho ingoan was, laip e stad deur.
⁰²Nou was doar n man, dij haitte Zacheüs. Hai was boas bie tollenoars. En hai was riek.
⁰³Hai perbaaierde te zain wat veur ain of Jezus was. Mor t lokte hom nait, omreden der was veul volk op n bainen en hai was ja mor n luk kereltje.
⁰⁴Dou runde hai veuroet en kroop in n wilde viegeboom. Den kon e hom zain. Hai zol doar ja langs kommen.
⁰⁵Dou Jezus bie dat stee kwam, keek e omhoog en zee tegen hom: “Zacheüs, kom op slag omdeel! k Mout vandoag bie joe wezen.”
⁰⁶Dou kwam e gaauw ommeneden en blied luit e hom der in.
⁰⁷Dou zai t zagen, mòtjeden ze aalmoal en zeden: “Dat e bie zo’n zundeg man wezen wil!”
⁰⁸Mor Zacheüs kwam in t èn en zee tegen de Heer: “Hierzo, Heer! Haalfschaid van mien haile hebben geef k aan aarme lu. As k ain wat ofzet heb den krigt t van mie dubbeld en dwaars weer!”
⁰⁹Jezus zee tegen hom: “Nou is ter veur dizze hoesholden redden kommen. Hai is ook ja n zeun van Abraham.
¹⁰ Doar is Menskenzeun ja veur kommen. Om te zuiken en te redden wat of verloren was.”