Deuteronomium 30:1-10

⁰¹As joe t aalmoal overkommen is wat ik joe veurholden heb, zegen en vluik, en t het joe tou inkeer brocht maank ale volken doar de HEER, joen God, joe hèndreven het en ie lustern noar hom in ales wat ik joe vandoag opdroag,
⁰²en ie en joen kinder keren van haarten weerom noar de HEER, joen God, en ie lustern noar hom in ales wat ik joe vandoag opdroag,
⁰³den zel de HEER, joen God, n keer brengen in joen lot, meedlieden mit joe kriegen en joe vannijs bie nkander brengen oet ale volken doar de HEER, joen God, joe onder verspraaid het.
⁰⁴Of zollen zai ook verdreven wezen tot aan t èn van hemel tou, de HEER, joen God, zel heur doar weghoalen en bie nkander brengen.
⁰⁵De HEER, joen God, zel joe brengen noar t laand dat joen veurolders in bezit haren en dat ie nou kriegen zellen. Hai zel t goud mit joe moaken en ie zellen nog groder in tal worden as joen veurolders.
⁰⁶De HEER, joen God, zel joen haart en t haart van joen noazoaten, besnieden dat ie mit haart en ziel de HEER, joen God, laifhebben en ie leven maggen.
⁰⁷Ale vervluikens zel de HEER, joen God, deelkommen loaten op joen vijanden, op heur dij joe hoaten en vervolgd hebben.
⁰⁸Ie zellen weer lustern noar de HEER en aal zien geboden noakommen dij ik joe vandoag opleg.
⁰⁹De HEER, joen God, zel joe rij bedailen bie aal wat ie ondernemen, in vrucht van joen schoot, in vrucht van joen vij en van joen grond. Want de HEER zel weer nocht aan joe hebben en joe in bliedschop t goie geven, krekt zo as hai joen veurolders doan het,
¹⁰ as ie lustern noar de HEER, joen God, en joe sekuur holden aan aal zien geboden en zien veurschriften onderholden dij opschreven stoan in dit wetbouk; as ie joe mor mit joen haile haart en joen haile ziel omkeren noar de HEER, joen God.