Deuteronomium 30:11-20

¹¹ Want dit gebod dat ik joe vandoag opleg, is joe nait te maans en t staait nait te wied van joe òf.
¹² t Is nait in hemel, dat ie zeggen mozzen: ‘Wèl zel veur ons noar hemel omhoog goan om t op te hoalen en ons heuren te loaten, dat wie t noakommen?’
¹³ t Is ook nait aan aander kaant zee, dat ie zeggen mozzen: ‘Wèl zel veur ons oversteken noar aander kaant zee, t ophoalen en ons heuren loaten dat wie t noakommen?’
¹⁴ Nee, dit gebod is stoef bie joe, in joen mond en in joen haart, om t noa te kommen!

¹⁵ Kiek, vandoag hol ik joe t leven en t goie veur, mor dood en t kwoad gelieke goud.
¹⁶ Wat ik joe vandoag opleg, is de HEER, joen God, laif te hebben, in zien wegen te goan en zien geboden, veurschriften en regels te onderholden. Den zel ie leven en groot in tal worden, en de HEER, joen God, zel joe zegen geven in t laand doar ie hèngoan om dat in bezit te nemen.
¹⁷ Mor as ie joen haart ofkeren en nait lustern en ie loaten joe verlaaiden en boegen joe veur aander goden deel om heur te dainen,
¹⁸ den zeg ik joe dat ie vervaast omkommen en nait laank leven zellen in t laand dat ie, as ie Jordaan overtrokken binnen, in bezit nemen goan.
¹⁹ Hemel en eerde roup ik ter bie as getugen: leven en dood en zegen en vluik heb ik joe veurholden. Kais den veur t leven, dat ie en joen noageslacht leven zellen
²⁰ deur de HEER, joen God, laif te hebben, deur te lustern noar zien stem en stief bie hom te blieven, want hai is joen leven en joen börg. Dat ie laank wonen maggen in t laand dat de HEER onder aid aan joen veurolders, Abraham, Isaak en Jakob, beloofd het heur te geven.”