Lucas 13:31-35

³¹ Net dou kwammen der n stokkewat Farizeeërs noar hom tou. Dij zeden: “Goa hier vot en moak dat ie wegkommen! Herodes staait joe noar t levent.”
³² Hai zee tegen heur: “Goa hèn en zeg tegen dij vos: ‘Heur es! Vandoag en mörgen drief ik kwoaie gaisten oet en ik moak zaiken beter. Overmörgen bin ik aan t èn.’
³³ Allain vandoag en mörgen en overmörgen mout ik nog onderwegens wezen. t Kin ja nait dat n profeet ombrocht wordt boeten Jeruzalem.
³⁴ Jeruzalem! Jeruzalem! Doe dij profeten vermoordst en stainegst wèl of noar die toustuurd binnen. Hou voak heb ik dien kinder om mie tou hebben wild, net as n klok heur kukens onder heur vleugels. En ie hebben nait wild.
³⁵ Nou den! Ik loat joe zitten mit joen hoes. En ik verzeker joe: ie kriegen mie vervaast nait meer te zain aan tied tou dat ie zeggen: ‘Veul zegen veur hom, dij komt in de Heer zien noam!’”