Psaalm 55:1-16

⁰⁰¹Veur meziekmeester. Mit snoarenspul. n Kunsteg laid van David.

⁰⁰²Verheur, o God, mien beden,
kroep veur mien smeken nait bezied,

⁰⁰³heur goud noar mie en geef mie antwoord.
Kloagend loop ik om en om en wait mie gain road

⁰⁰⁴mit gebèlk van vijand
en tekeergoan van goddeloze,

want zai störten onhaail over mie,

bestoken mie mit heur gram.

⁰⁰⁵Mien haart verkrimpt mie in t lief,
doodsangsten stoa ik oet,

⁰⁰⁶schrik en aalteroatsie overvalen mie,
griezel lopt mie over graauwel.

⁰⁰⁷Ik docht: Haar ik mor vleugels as n doef,
den vloog ik vot en zöchte n stee doar ik wonen kon,

⁰⁰⁸joa, vluchten zol ik, hail wied vot,
k zol overnachten in woestijn, qs selaqs*

⁰⁰⁹geswind n schoelstee zuiken
as aine bui de aander jagt.

⁰¹⁰ Moak heur in toeze, spliet heur toal,
want in stad komt roezie en geweld in t zicht,

⁰¹¹ doags en bie nachten dut men de ronde over muren,
doar binnen is onhaail en ellèn,

⁰¹² t is doar aal verdaarf: onderdrokken en bedrog,
dij hebben vaaste vout op t maartplaain.

⁰¹³ t Is ja gain vijand dij mie taargt, doar zol ik nog wel over kinnen,
en nait ain dij mie hoat oet grootseghaid,

dij zol ik wel ontlopen.

⁰¹⁴ Mor doe, doe dochst en deest as ik,
mien grode vrund, doar ik op baauwen kon!

⁰¹⁵ Mien beste vrund: mit ons baaident
was wie in t gedrang in t hoes van God.

⁰¹⁶ Dat dood heur overlopen mag
en zai bie t levent in dodenriek deelzakken,

t kwoad hoest ja bie heur,

deur ales hèn.