Deuteronomium 27:1-13

⁰¹Mozes en oldsten van Israël bestelden t volk: “Hol joe zunder mekaaiern aan dit haile gebod dat ik joe vandoag opleg:
⁰²Op dag dat ie over Jordaan trokken binnen noar t laand dat de HEER, joen God, joe geft, mout ie grode stainen in t èn zetten en dij witkaalken.
⁰³As ie overstoken binnen om in t laand te kommen dat de HEER, joen God, joe geft, t laand dat overlopt van melk en hunneg zo as de HEER, de God van joen veurolden, joe touzegd het, den mout ie doar ale woorden van dizze wet op schrieven.
⁰⁴As ie Jordaan overstoken binnen, mout ie dizze stainen in t èn zetten op baarg Ebal en witkaalken, zo as ik joe vandoag zegd heb.
⁰⁵Baauw doar den n altoar veur de HEER, joen God, n altoar van stain, ie maggen t nait mit iesder bewaarken.
⁰⁶Van stain dat nait bewaarkt is, mout ie dat altoar van de HEER, joen God, baauwen en ie mouten der brandovvers op brengen veur de HEER, joen God.
⁰⁷Vree-ovvers mout ie doar ook slachten en eten. Blied zel ie wezen veur de HEER, joen God.
⁰⁸Schrief den dudelk en kloar ale woorden van dizze wet op dij stainen.”

⁰⁹Mozes en Levitische priesters zeden tegen hail Israël: “Wees stil, Israël, en luster. Vandoag bin ie t volk van de HEER, joen God, worden.
¹⁰ Luster doarom noar wat de HEER, joen God, joe zegt en kom zien geboden en veurschriften noa dij ik joe vandoag geef.”

¹¹ Op dij dag druig Mozes t volk op:
¹² “As ie Jordaan overstoken binnen, mouten Simeon, Levi, Juda, Issachar, Jozef en Benjamin op baarg Gerizim stoan goan om t volk zegen te geven.
¹³ En Ruben, Gad, Aser, Zebulon, Dan en Naftali mouten op baarg Ebal stoan om te vervluiken.