Lucas 12:13-21

¹³ Ain oet t volk zee tegen hom: “Meester, zeg es tegen mien bruier dat e aarvenis mit mie dailen mout.”
¹⁴ Mor hai zee tegen hom: “Wèl het mie aansteld as rechter of notoares over joe?”
¹⁵ Hai zee tegen heur: “Kiek ter op tou dat ie joe woaren veur gieren en groapen. t Is ja zo: ook al het ain meer as genogt, zien bezittens binnen nait wis veur zien levent.”
¹⁶ Doarom vertelde hai heur n geliekenis: “n Riek man zien gewazzen haren goud schud.
¹⁷ En hai ging bie zokzulm te roade en zee: ‘Hou mout ik ter mit aan? Ik heb ja gain roemte genogt om mien vruchten op te baargen.’
¹⁸ Dou zee e: ‘Waist wat? k Breek mien schuren òf en baauw grodern. En doar baarg k aal mien koorn en aal mien goud in op.
¹⁹ Den zeg k tegen miezulm: Jong, nou hest ter zo’n baarg goud liggen, kinst ter joaren mit tou. Goa mor rentnaaiern! Eet en drink en moak mor plezaaier!’
²⁰ Mor God zee tegen hom: ‘Onverstand dastoe bist! Dizze naacht zellen ze dien levent opaaisen. En wastoe veurnkander moakt hest, wèl krigt dat?’
²¹ Zo vergaait t ain dij veur zokzulm oppot en zien riekdom nait bruukt veur God.”