Galoaten 1:13 – 24

¹³ Ie hebben ja vast wel heurd dat ik eertieds pertij van Jeudse drievers aanhong. Dat ik, meer as wèl ook, achter God zien gemainte heer zat en dij verrinnewaaierde.
¹⁴ Ik brochde t in dat Jeudse drieven wieder, as n bult jonges van t zulfde older onder ons volk. Zo fèl kwam ik op veur regels dij wie van ons olders deurkregen haren.
¹⁵ Mor God haar – al van veur mien geboorte òf aan – mie apaart holden en roupen deur de goaven dij e mie gaf. Dou hai t tied von
¹⁶ zien Zeun in mie veurndag kommen te loaten om dij aan haaidens te verkundegen, heb ik den ook van stonden òf aan gain mensk meer om road vroagd.
¹⁷ k Bin ook nait noar Jeruzalem tou raaisd, noar dijent dij al eerder as ik apostels wazzen, mor ik bin noar Arabië goan, en dou weerom noar Damascus.
¹⁸ Eerst drij joar loater bin k noar Jeruzalem tou goan om Kefas op te zuiken. Bie hom bin k twij week bleven.
¹⁹ Ain van aander apostels heb ik nait zain. Wel nog Jakobus, ons Heer zien bruier.
²⁰ Wat ik joe nou schrief … denk ter om: dat laig ik nait! God kin t getugen.
²¹ Loater kwam ik in kontrainen van Syrië en Cilicië.
²² Christelke gemaintes in Judea konnen mie nait van aanzain.
²³ Wat ze heurden was nait meer as: “Dij man dij doudestieds achter ons heer zat, verkundegt nou de leer dij e vrouger mit ale geweld bestree!”
²⁴ En ze prezen God om wat of ter mit mie gebeurd was.