Psaalm 28

⁰⁰¹Van David.
Ik roup om joe, HEER,

mien rots, hol joe nait doof veur mie.

As ie swiegen blieven,

wor ik as ain dij t graf ingaait.

⁰⁰²Heur noar mien haarde roupen
as ik smeek om hulp,

as ik mien handen omhoogsteek

noar t haailegste van joen haailegdom.

⁰⁰³Reu mie nait oet mit goddelozen,
mit lu dij onrecht doun,

dij mooi proaten mit heur noabers,

mor in heur haart nait deugen.

⁰⁰⁴Dou heur noar heur doaden,
geef heur wat heur toukomt,

noar t waark van heur handen,

loat heur bouten veur wat ze deden.

⁰⁰⁵Want zai holden gain reken, HEER, mit joen doaden,
of t waark van joen handen.

Hai slagt heur deel en baauwt heur nait weer op.

⁰⁰⁶Te priezen is de HEER,
hai het mien haarde roupen heurd.

⁰⁰⁷De HEER is mien kracht en mien schild,
op hom vertraauwt mien haart,

hai het mie hulpen, nou kin mien haart weer jubeln,

hom wil ik priezen in mien laid.

⁰⁰⁸De HEER bruukt zien kracht veur zien volk,
hai is n vesting van redden veur zien gezaalfde.

⁰⁰⁹Red joen volk en zegen joen aigendom,
wees heur hedder en droag heur veur aaid.