12 Blied daank ie den de Voader. Hai stelt joe in stoat joen aarfdail te aanveerden, dij kloarligt in t laand van t licht veur dijent dij bie God heuren.
13 Hai het ons vothoald tou macht van t duustern oet en ons overbrocht noar t keunenkriek van zien laive Zeun.
14 Dij betoalde veur ons vrijloaten; dij muik dat zunden ons kwietscholden worden.
15 In hom krieg we God te zain, dij onzichtboar is.
Van aal dat schoapen is, kwam hai t eerst op wereld.
16 Deur hom is ales ja schoapen
dat touholdt in hemel en op eerde;
wat te zain en wat nait te zain is.
Netgliek of ze in God zien troonroad zitten of wait ik wat veur zeggenschop hebben;
of ze in t wereldbestuur zitten of grode volmachten hebben:
t is aal deur hom schoapen en om weer bie hom terecht te kommen.
17 Hai was ter eerder as ale aander dingen,
t bestaait aal deur hom.
18 Hai is t hoofd van t liggoam: zien kerk.
Mit hom begunde t; hai was as eerste oet t dodenriek geboren,
den kon e in ales koploper wezen.
19 God haar ja besloten in aal zien volhaid bie hom zien intrek te nemen,
20 en deur hom ales weer mit zok in t lieke te brengen;
deur zien bloud aan t kruus vree te stichten tussen hom en zien schepsels,
netgliek of ze op eerde of in hemel touholden.
21 Doar vuil ie ook onder. Der was ja verwiedern tussen God en joe. Ie beschaauwden hom as joen vijand. Dat bleek oet joen minne doun.
22 Mor nou bin ie weer mit hom in t lieke kommen deurdat Christus in zien bestoan as mensk dood inging om joe haaileg en zunder lek of brek veur God verschienen te loaten.
23 As ie nou den ook mor volholden te leuven, vaast in joen schounen stoan en joe nait ofbrengen loaten van dat, doar bliede bosschop joe oetzicht op geft. Dij bosschop dij ie heurd hebben, dij oetbezuund is in hail dizze schoapen wereld, zo wied as hemel zok doarover oetstrekt. Dij bosschop dij ik, Paulus, rondzeggen mout.