t Evengelie volgens Lucas 16:19-31

¹⁹ Der was es n riek man. Hai laip altied in t mooiste en duurste goud en gaf aal doage groot feest.
²⁰ En bie hom veur deur lag n aarme man, Lazarus haitte dij.
²¹ Hai zat onder swèllen en wol geern eten van wat of ter van rieke man zien toavel ofvalen was. Mor doar kwammen ook honden op òf. Dij slikten aan zien swèllen.
²² Dou gebeurde t dat stumper oet tied kwam. En engels druigen hom noar n stee, stoef noast Abraham. Ook rieke man kwam oet tied en wer begroaven.
²³ En dou hai in t dodenriek onder aal zien pienen ogen opsluig, zag e van vèrren Abraham mit Lazarus noast hom.
²⁴ Dou raip e: ‘Voader Abraham! Heb mit mie te doun en stuur Lazarus, dat e zien vingertop even in t wotter stipt om mien tong wat vris te moaken. k Vergoa van pien in dizze vlammen!’
²⁵ Mor Abraham zee: ‘Mien jong! Dou der denk om dastoe dien pozzie gouds al had hest in dien levent. En krekt zo Lazarus zien pozzie ellèn. Nou vindt hai hier zien troost en mostoe pien lieden.
²⁶ En boetendes: tussen ons en joe is n daibe ofgrond, dat dij van hier noar joe tou wil, dat nait doun kin. En net zo min ain doarvandoan noar ons toukommen kin.’
²⁷ ‘Nou,’ zee rieke, ‘den vroag ik joe voader, dat ie hom noar mien olderliek hoes tou sturen.
²⁸ k Heb ja nog vief bruiers. Loat e dij den terdeeg woarschaauwen. Aans belanden zai ook nog op dizze folterploats.’
²⁹ Mor Abraham zee: ‘Zai hebben Mozes en profeten ja! Loat ze noar heur lustern!’
³⁰ ‘Wel nee, voader Abraham,’ zee e, ‘mor as ain oet t dodenriek noar heur tou gaait, zellen ze zok wel bekeren!’
³¹ Mor hai zee tegen hom: ‘As ze nait noar Mozes en profeten lustern, zellen ze der ook niks noar geven as ter ain oet t dodenriek opstaait!’”