Lucas 13:1-9

⁰¹Net om dij tied kwammen der gounent bie hom mit tieden over Galileeërs: Pilatus haar heur bloud mongen mit t bloud van heur ovverdaaiern.
⁰²Hai zee tegen heur: “Main ie dat dizze Galileeërs slimmer zundoars wazzen as aal aander Galileeërs, omreden dit is heur overkommen?
⁰³Nee hur! Mor as ie joe nait bekeren, zel ie aalmoal gliekegoud omkommen.
⁰⁴Neem nou dij achtien dij heur dood vonden dou t bolwaark van Siloäm op heur deelkwam. Main ie dat dij meer op heur gewaiten haren as aal aander lu dij in Jeruzalem wonen?
⁰⁵Nee hur! Mor as ie joe nait bekeren, zel ie aalmoal gliekegoud omkommen!”

⁰⁶Dou vertelde hai heur dizze geliekenis: “Ain haar n viegeboom in zien droevetoen stoan. Hai kwam es kieken of ter ook viegen aanzatten. Mor hai kon gainent vinden.
⁰⁷Hai zee tegen man dij droevetoen verzörgde: ‘Nou mout je ais begriepen! Al drij joar kom ik om te zain of ter ook vruchten aan dizze boom zitten. Mor k vin nooit ain. Haauw hom mor om! Hai is zien stee ja nait weerd.’
⁰⁸Mor man zee: ‘Heer, loat hom dit joar nog stoan. Ik wil eerst grond ter omtou nog es omhoaken en der mis bie doun.
⁰⁹As e den kommend joar dragt: goud! En aans mout e mor om.’”