Lucas 9:51-62

⁵¹ Dou tied dat e opnomen worden zol noaderbie kwam, wol e liekoet noar Jeruzalem tou.
⁵² Hai stuurde boden veur zok oet. Dij gingen op pad en kwammen in n Samaritoans dörp om boudel veur hom kloar te moaken.
⁵³ Mor ze wollen hom doar nait hebben. Hai was ja onderwegens noar Jeruzalem tou.
⁵⁴ Dou leerlingen Jakobus en Johannes dat gewoarwerden zeden ze: “Heer, wil ie dat wie zeggen, dat ter vuur van hemel deelkommen zel om heur te verteren?”
⁵⁵ Mor hai draaide zok om en zette heur terecht.
⁵⁶ Dou gingen ze noar n aander dörp tou.

⁵⁷ Dou ze onderwegens wazzen, zee ain tegen hom: “Ik goa mit joe! Netgliek woar of ie hèngoan!”
⁵⁸ Mor Jezus zee tegen hom: “Vozzen hebben heur holen en vogels hebben heur nusten. Mor Menskenzeun het gain stee om kop deel te leggen.”
⁵⁹ Hai zee tegen n aander: “Goa mit mie!” Mor dij zee: “Vin ie t goud dat k eerst nog hèngoa en begroaf mien voader?”
⁶⁰ Mor Jezus zee tegen hom: “Loat doden heur doden begroaven. Mor doe mos ter op oet om tieden van God zien riek rond te zeggen.”
⁶¹ Weer n aander zee: “Ik goa mit joe, Heer! Mor loat mie eerst ofschaaid nemen van mien volk.”
⁶² Jezus zee: “Wèl of ainmoal aan t plougen goan is en den nog achterom kikt, zo ain is veur God zien riek nait te bruken.”