Lucas 12:22-32

²² Hai zee tegen zien leerlingen: “Doarom zeg ik joe: zit mor nait in zörg over joen moag wat of ie eten zellen. Of over joen veurkommen wat of ie aantrekken zellen.
²³ Joen moag is van meer belang as joen eten en joen veurkommen as joen klaaier.
²⁴ Denk es om kraaien! Ze zaaien nait en ze zichten nait. Ze hebben gain kelder of gain schuur. Toch vouert God heur. Ie binnen toch veul meer weerd as dij vogels?
²⁵ Wèl van joe kin mit prakkezaaiern zokzulm n èl laanger moaken?
²⁶ Nou, as ie t minste nait ainmoal doun kinnen, woarom zol ie den over dij aander dingen prakkezaaiern?
²⁷ Kiek es noar lelies! Spinnen dounen ze nait en weven dounen ze ook nait. Ik zeg joe: Salomo in aal zien stoatsie was nait ains zo mooi aantrokken as ain van dijent.
²⁸ As God nou t gras op t laand dat ter vandoag nog staait en mörgen in ovent opbraand wordt zo aankledt, den zel e joe dat toch veul meer doun? Ie mozzen hom wat beter vertraauwen!
²⁹ Ie mouten ook nait aal vroagen: ‘Wat zel wie eten?’ of ‘Wat zel wie drinken?’ Moak joe doar mor nait drok om.
³⁰ Dat binnen aal dingen doar mensken van wereld zok dik om moaken. Mor joen Voader wait dat ie doar verlet om hebben.
³¹ Nee, ie mouten joe drok moaken om zien riek. Den krieg ie dij dingen boetendes.
³² Wees mor nait baang, lutje koppeltje! Joen Voader het joe t riek ja toudocht.