Johannes 2: 23-3:13

²³ Dou e mit Pesach in Jeruzalem was, gavven veul lu hom heur vertraauw, om taikens dij e aalweg zain luit.
²⁴ Mor Jezus vertraauwde zokzulm nait aan heur tou, omreden hai wos hou of ze wazzen.
²⁵ Verkloarens over zokzulm haar e nait neudeg. Wat ter in n mensk stekt, dat wos hai zulm ja wel.

⁰¹Nikodemus was ain van Jeudse laaiders; hai heurde bie Farizeeërs.
⁰²Dizzent ging op n naacht noar Jezus tou en zee: “Rabbi, ie mouten wel n leroar wezen dij bie God zulm votkomt. Doar kin wie ja nait omtou. Want as ain zokse biezundere taikens zain let as ie doun, den kin t nait aans as dat God hom helpt.”
⁰³“Denk ter goud om,” zee Jezus, “as ter ain, hou den ook, inzain kin dat God t is dij macht over ales het, den mout dij eerst vannijs geboren worden.”

⁰⁴“Hou kin dat nou?” zegt Nikodemus. “Ain kin toch nait veur twijde moal geboren worden? En zeker nait as e old is! Hai kin toch nait veur twijde moal weer t lief van zien moeke in en den nog ais weer geboren worden?”
⁰⁵“Dou der denk om,” zee Jezus weer, “enkeld as n mensk deur wotter en gaist geboren wordt, kin e inzain dat God ale macht het.
⁰⁶Want elk dij geboren is volgens noatuurleke gaang van zoaken, heurt bie dij noatuur. Wat geboren is volgens gaistelke gaang van zoaken, heurt bie dij Gaist.
⁰⁷Ie huiven joe der haildaal nait over verboazen as k tegen joe zeg: ‘Ie mouten vannijs geboren worden.’
⁰⁸Wind dut wat e wil; ie heuren hom aal, mor zain dou ie hom nait. Je waiten nait woar of e heerkomt en woar of e hèngaait. Zo gaait t as je volgens gaistelke gaang van zoaken geboren worden.”
⁰⁹“Mor hou gaait dat den in zien waark?” vruig Nikodemus.
¹⁰ “Wát!” zee Jezus, “ie binnen leroar van Israël en ie hebben doar gain wait van?
¹¹ Dou der denk om, k wait woar k t over heb en dat zeg k joe. k Wait ter ales van en wat k zeg is woarhaid. Mor ie willen der nait aan!
¹² Ie leuven mie al nait as k t mit joe over dingen van dizze wereld heb. Hou zel ie den leuven as k t mit joe over God heb?
¹³ Ik kin t waiten: allenneg as je bie God heuren en bie hom votkommen, kin dat. Ik, Menskenzeun, kom bie God vot.